Ֆրանսիայում Հայաստանի դեսպանը հանդիպեց Ազգային ժողովի Ֆրանսիա-Հայաստան բարեկամության խմբի հետ

05 ապրիլի, 2023

Ապրիլի 5-ին Ֆրանսիայում ՀՀ դեսպան Հասմիկ Տոլմաջյանը հանդիպեց Ֆրանսիայի Ազգային ժողովի Ֆրանսիա-Հայաստան նորակազմ բարեկամության խմբի անդամների հետ: Միավորելով քաղաքական տարբեր խմբեր ներկայացնող ութ տասնյակից ավելի պատգամավորների՝ Հայաստան-Ֆրանսիա բարեկամության խումբը հանդիսանում է Ազգային ժողովի ամենաստվար խմբերից մեկը։ Հանդիպմանը ներկա էր նաև Ֆրանսիայում Արցախի ներկայացուցիչ Հովհաննես Գևորգյանը։

Դեսպան Տոլմաջյանն իր խոսքում ընդգծեց հայ-ֆրանսիական առանձնաշնորհյալ հարաբերությունների և առկա բարձր մակարդակի քաղաքական երկխոսության կարևորությունը, ինչպես նաև երկու երկրների հարաբերություններում միջխորհրդարանական համագործակցության, այդ թվում՝ խորհրդարանական բարեկամական խմբերի գործունեության առանձնահատուկ դերակատարությունը:

Դեսպանը պատգամավորներին ներկայացրեց Ադրբեջանի կողմից Հայաստանի դեմ իրականացված ագրեսիայի, ինչպես նաև Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված հումանիտար ճգնաժամի հետևանքներն ու այն գոյաբանական սպառնալիքները, որոնց այսօր առերեսվում է Արցախի բնակչությունը։

Անդրադառնալով դեսպանության և բարեկամության խմբի միջև հաստատված արդյունավետ համագործակցությանը՝ դեսպանը բարձր գնահատեց նաև Ֆրանսիայի Ազգային ժողովի կողմից իրականացվող կարևոր գործունեությունը՝ միտված միջազգային հանրության ուշադրությունն Արցախում ստեղծված հումանիտար ճգնաժամի վրա սևեռելուն։ Այս տեսանկյունից, դեսպան Տոլմաջյանը երախտագիտություն հայտնեց նաև 2022թ․ նոյեմբերի 30-ին Ազգային ժողովի կողմից ադրբեջանական ագրեսիան դատապարտող բանաձևի ընդունման, ինչպես նաև Հայաստան իրականացվող խորհրդարանական պարբերական այցերի համար՝ առանձնացնելով, մասնավորապես, այս տարվա հունվարին Ֆրանսիայի Ազգային ժողովի նախագահի գլխավորած պատվիրակության պաշտոնական այցը Հայաստան։

Բարեկամության խմբի նախագահ, Բուշ-դյու-Ռոնի դեպարտամենտի պատգամավոր Անն-Լորանս Պետելը, մտահոգություն հայտնելով ադրբեջանական սպառնալիքի հետևանքով Հայաստանում և Արցախում ստեղծված իրավիճակի առնչությամբ, վերահաստատեց բարեկամության խմբի համերաշխությունը Հայաստանին և աջակցությունը Արցախի 120 000 բնակչությանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր